- 64 -

1457. Oktober 4.

Wir Conradt von gottes Gnaden herczok in Schlesien zur Oelssen vnd Kosel etc. Thuen kundt v. Bekennen Offentlichen mit dem Briefe vor Allen die In sehen hören oder lesen, das wir mit den woltüchtigen vnsern lieben getrauen Ianen Schielhan von Otmut v. Henczen Pozarn zwieschen den Woltiechtigen Vnsern lieben getreuen Drssken Laskowsken v. Iaschken Laskowsky gebruedern An eyme, Vnnd Myschen Dobeschowsky von seinen seyner brueder v. geschwiester wegen am Andern Teil, mit beyder Teyl gutter wiellen eyne gancze v. volkomliche vorrichtunge v. entscheydt gemacht haben, als vmb die Zwietracht die sie gehabt haben von hern Iohannes Dobeschowsky vätterlich v. mutterlich Erb teyl wegen, Das her Derschken Laskowsky In den guttern Dobeschaw v. Paulwicz hatt auffgeben v. abgetretten, daruff haben wir beredt v. gemacht, das Drschke Laskowsky sol funf v. sebenczyk margk groschen auf diese nachgeschriebene Tage Myschen Dobeschowsky seynen bruedern v. geschwiestern geben v. beczalen, Nemlichen erst auf Martin czehen mark groschen, v. darnach vff die Nachkomenden weynachten aber zehen margk groschen, v. funf vnd funffczik margk groschen sol Drschke Laskowsky vorbürgen Myschen Dobeschowsky v. seynen bruedern zuegeben v. zuebeczalen von dem Nehesten Sankt Mertens Tage vber Ein Iar. Item auch sol Drschke Laskowsky Iungfraw Machna Myschen Dobeschowsken schwester die do im Kloster ist zue Ratibor vormachen v. vorschreiben Anderthalbe margk geldes Ierliches Zienses vff dem gutte Dobeschaw bies zue Iren lebentagen, Vnnd Mysche Dobeschowsky von seynen v. seiner brueder wegen sol Iungkfraw Machna seyner schwester auch vormachen v. vorschreiben vff dem gutte Paulwicz eine mragk geldes Ierliches Zienses bies zue Iren lebtagen, Vnnd nach Irem Tode sol die Anderthalbe margk vff Dobeschaw an Drschken v. seyne Erben kommen, v. die Margk auf Paulwicz an Myschen Dobeschowsken v. seine Brueder. Item die funfczyk margk die do stehen vff den guettern Dobeschaw v. Paulwicz sol Drschke Laskowsky vff sich nemen v. die zue den geistlichen vortreten, v. es mit In dorumb gleich halden, v. das gutt Paulwicz vor den selbigen fünfczik marken freyen, v. Also sol das gutt Dobeschaw Drssken Laskowsky v. seyner Erben sein Erblichen v. domitte Thuen v. lassen, v. das gutt Paulwicz Myschen Dobeschowsky v. seinen bruedern bleyben. Solliche vnnser vorrichtunge v. entscheidt haben beyde Teyl geliebet v. aufgenommen williglichen zue einer ewigen vorrichtunge v. entscheide. Zue vrkunde vorsiegelt mit vnserm Anhangenden Insiegel. Geschen v. geben zur Kosel am Dienstage an Sanct Francisky Takg Nach gottes geburtt vierczehen hundertt v. darnach In dem sieben v. funfzigsten Iare. Dabey seint gewest vnsre liebe getrauen, Schawel Twardawa, Heinze Landskron, Kliemke Kobeliczky von Geraltowicz, Stanislaw Brzezinka, Henrich Dyalosch, Ian Tlomok, Adam Perzyna vnd Paulus Dablin vnser schreiber dem diese sachen worden befohlen.

Aus einer alten Abschrift.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.